Matola mguu sawa kurejea Simba

Wakati uongozi wa klabu ya Simba ukiendelea kusaka Kocha Mkuu baada ya kumtimua Patrick Aussems, kocha wa Polisi Tanzania Selemani Matola yuko mbioni kurejea Msimbazi kuwa kocha msaidizi

Inaelezwa jina la Matola limepitishwa baada ya kujiridhisha na uwezo wake lakini wameona ni wakati sahihi kwake kurejea Msimbazi

Matola amekuwa familia ya Simba kwa muda mrefu. Pamoja na kufundisha timu nyingine, Matola amekuwa akishirikishwa katika masuala mbalimbali na uongozi wa Simba

Aliwahi kuwa nahodha na baadae kocha wa timu ya vijana kisha kupandishwa timu ya wakubwa kuwa msaidizi wa Dyran Kerr

Uwezo wake wa kutambua wachezaji wenye vipaji unatajwa kumbeba kupewa majukumu na Simba

Ukitaja nyota kama Ibrahim Ajib, Haruna Shamte, Jonas Mkude, Mohammed Hussein, Miraji Athumani, Ramadhani Singano 'Messi', Said Ndemla, Haruna Chanongo, Humud, Makame na wengine wengi tu walipita mikononi mwa Matola

Matola analifahamu vyema soka la Tanzania, anawafahamu vyema wachezaji wa Kitanzania ndio maana amekuwa akipata maanikio hata akiwa na timu ndogo

Pamoja na kuinoa Polisi Tanzania, Matola ni kocha msaidizi wa timu ya Taifa ya Tanzania 'Taifa Stars' inayonolewa na Etienne Ndayiragije