JKT TANZANIA: SIMBA WAMEVURUGAVURUGA HESABU ZETU

KOCHA Mkuu wa JKT Tanzania, Mohamed Abdallah 'Bares' amesema kuwa alijipanga kupata sare kwenye mchezo wa jana kupoteza kwa kufungwa bao 1-0 uwanja wa Uhuru kumevuruga hesabu zake.

Bares amesema kuwa aliitambua Simba mapema namna inavyocheza hasa kwa kutumia viungo wao na washambuliaji wengi ambao wana uchu wa kufunga muda wote hali iliyomfanya aingie kwa kujilinda na kushambulia kwa kushtukiza.

Akizungumza na Saleh Jembe, Bares amesema alitumia muda mwingi kusoma mbinu za wapinzani wake hali iliyomfanya aanze kwa kujilinda na kushambulia kwa kushtukiza.

"Simba ina timu nzuri na kubwa hasa ukizingatia imetoka kushiriki michuano ya kimataifa, wachezaji wake wana uzoefu tofauti kidogo na wangu hilo nililitambua ndio maana nikaongeza nguvu kujilinda na kushambulia kwa kushtukiza.

"Kufungwa kwetu kumeniumiza pia hata kutolewa kwa mchezaji wangu Anuary Kilemile kuliongeza ugumu wa mchezo ila hakuna namna tutaendelea kupambana kwenye michezo yetu inayofuata," amesema Bares.

JKT Tanzania ipo nafasi ya 13 kwenye msimamo wa Ligi Kuu Bara baada ya kucheza michezo 33 imejikusanyia pointi 39 kibindoni.