Manara awaita mashabiki kuimaliza Azam Fc Ngao ya Jamii

Msemaji wa klabu ya Simba Haji Manara amewataka mashabiki wa timu hiyo kujitokeza kwa wingi kwenye mchezo wa Ngao ya Jamii dhidi ya Azam Fc ambao utapigwa keshokutwa Jumamosi kwenye uwanja wa Taifa

Kiingilio cha chini kabisa cha mchezo huo ambao utapigwa saa moja jioni ni Tsh 5,000/-

Manara amesema msimu huu Simba imejiwekea malengo ya kutwaa makombe ya michuano yote itakayoshiriki hapa nchini

"Tunawaomba mashabiki wetu waje kwa wingi Jumamosi washuhudie kandanda safi kutoka kwa mabingwa wa nchi," amesema

"Tumeshachukua Ngao ya Jamii kwa misimu miwili mfululizo, tunataka kuchukua kwa mara ya tatu"

"Sisi lengo letu hasa ni kuchukua Ngao za Jamii kwa miaka 10 mfululizo kama ilivyo kwa ubingwa wa ligi kuu"

"Msimu huu ni wa makombe kwa Simba, tumejipanga kushinda mataji yote hapa nchini"

Alia na jezi feki

Katika hatua nyingine, Manara amezitaka mamlaka husika kudhibiti uingizwaji wa jezi feki ambazo mauzo yake yanadhoofisha mapato ya klabu

Manara amesema baada ya Simba kuzindua jezi mpya, kumejitokeza maharamia wanaoingia jezi feki

"Tumezitaka mamlaka husika zisimamie changamoto hii. Tumewaambia, kwa mzigo wowote wa jezi za Simba unaoingia Bandarini au sehemu nyingine, ni vyema wakawasiliana nasi kujiridhisha kama ni wetu au la"

"Kwani wanaoingiza jezi feki mizigo yao inapita hapo Bandarini au sehemu nyingine ambazo tunaamini Serikali inaweza kudhibiti"