Kapombe aishangaa TFF

Beki wa Simba Shomari Kapombe ameshangazwa na taarifa iliyotolewa na Shirikisho la Mpira wa Miguu nchini (TFF) juu ya majeraha yake

Taarifa iliyotolewa mapema leo na TFF ilidai kuwa Kapombe alitonesha majeraha wakati akiwa mazoezi na kikosi cha timu ya Taifa hivyo anaweza kuondolewa kwenye timu hiyo inayojiandaa na fainali za AFCON 2019 zitakazofanyika Misri Juni 21

Hata hivyo Kapombe amesema taarifa hizo hazina ukweli wowote na anaendelea na program ya mazoezi aliyoachiwa na kocha wa Simba

"Taarifa ya mimi kutonesha majeraha imenisikitisha sana kwa kuwa haina ukweli wowote," amesema Kapombe

"Mimi nilipewa program maalum na kocha wangu wa Simba, sasa kwa kuwa michuano hii ya AFCON ninayotakiwa kwenda kushiriki inahitaji niwe fiti, nilipeleka mapendekezo kwa benchi la ufundi la Stars nikiomba niendelee na program ya mwezi mzima ambayo nimeachiwa na kocha"

"Lakini hawakunijibu na badala yake wametoa taarifa hii"

"Niwahakikishie wadau wa soka na mashabiki wa Simba kuwa mimi niko fiti, naendelea na program niliyoachiwa na kocha wa Simba"