Messi afunga hat trick, Barca mkono mmoja kwenye taji

Barcelona waliingia dimbani Jumapili katika mechi yao dhidi ya Real Betis wakifahamu fika kuwa nambari mbili Atletico Madrid walikuwa wameteleza dhidi ya Athletic Bilbao Jumamosi kwa kuzabwa 2 – 0.

Na wakauchukulia mtanange wa Betis kama wa jukwaa la Ulaya. Wakaimarisha safu ya ulinzi na kuwashambulia Betis. Mwishoshe, wakapata ushindi mnono wa 4 – 1.

Kama kawaida, Lionel Messi ndiye alikuwa muangamizaji mkuu. Alifunga mawili kipindi cha kwanza kabla ya kukamilisha hattrick  yake kwa kumvisha kanzu kipa wa Betis Pau Lopez katika dakika ya 85. Luis Suarez alifunga bao safi la kibinafsi alipowaacha hoi wachezaji kadhaa wa Betis.

Barca sasa wana faida ya pengo la pointi 10 kileleni mwa La Liga. Sasa wanaweza kuangazia macho yao tu kwa Champions League.