CHIRWA KUJIUNGA NA SIMBA, KIONGOZI AZAM AFUNGUKA

Ikiwa ni siku chache zimepita tangu Azam FC wamalizana na straika wake Donald Ngoma kwa kuongeza mkataba wa miaka miwili, taarifa za ndani kutoka kwa matajiri hao zinaeleza imekuwa ni ngumu kumalizana na Mzambia, Obrey Chirwa.

Taarifa imeeleza kuwa Chirwa ambaye anamaliza mkataba wake wa miezi 6 na Azam mwishoni mwa msimu huu amegoma kuongeza mwingine baada ya kutoafikia kiasi cha fedha ambacho Azam wamekiweka mezani.

Wakati ikielezwa Chirwa amegoma, mabingwa watetezi wa Ligi Kuu Bara, Simba, wameanza mazungumzo na mchezaji huyo pamoja na klabu ili kuchukua saini yake.

Kiasi cha dau la milioni 85 kinaweza kumsainisha Chirwa mkataba wa miaka miwili Simba ambalo mchezaji mwenyewe ameonekana kulipokea.

Afisa Mtendaji wa Azam, Abdulkarim Amin 'Popat' amesema walikaa na Chirwa kuzungumza lakini ameonesha hana nia ya kuendelea na Azam kutokana na dau walilomtajia.

"Chirwa alisaini mkataba wa miezi sita pekee na tumekuwa kwenye mazungumzo ya kuongeza mwingine, lolote linaweza kutokea.

"Kuhusu kwenda Simba si jambo la kushutua maana ndiyo maisha ya mpira na wachezaji kwa ujumla, mchezaji anaangalia wapi pana maslahi mazuri."