Bayern yakamata usukani kwa kuinyeshea Mainz 6 – 0

James Rodriguez aliifungia Bayern Munich hat trick yake ya kwanza katika ushindi wao wa pili mfululizo wa 6 – 0 katika Bundesliga dhidi ya Mainz na kukamata usukani wa ligi.

Bayern wako pointi sawa na Borussia Dortmund lakini wana faida ya mabao mengi. Wana mabao saba zaidi ya BVB.

Robert Lewandowski alifunga bao la ufunguzi kabla ya Rodriguez kuongeza la pili naye Mfaransa Kingsley Coman akafanya mambo kuwa 3-0.

Rodriguez alifunga mengine mawili kabla ya Alphonso Davies kusukuma wavuni la sita na la mwisho. Lilikuwa bao la kwanza la kinda huyo Mcanada mwenye umri wa miaka 18, na akawa mfungaji bao mdogo zaidi katika klabu hiyo tangu bao la Roque Santa Cruz mwaka wa 1999.