Yanga inashuka uwanjani ikiwa na historia nzuri chini ya Kocha wake,Mkwasa kufuatia matokeo ya ushindi mfululizo alioupata katika mechi mbili alizosimamia ikiwa ni Ndanda (1-0) na JKT Tanzania aliyoshinda 3-2.
YANGA imewasili jijini hapa tayari kwa mchezo wake wa Ligi Kuu dhidi ya Alliance utakaopigwa Ijumaa katika Uwanja wa CCM Kirumba.
Timu hizo zinatarajia kukutana kwa mara ya nne huku Yanga ikijivunia ushindi katika mechi tatu, hivyo mchezo huo utakuwa wa kuvunja au kuendeleza rekodi.
Kocha wa Yanga, Boniface Mkwasa ameeleza kuwa mechi hiyo itakuwa ngumu kutokana na wapinzani wao kutopata matokeo mazuri katika mchezo wao uliopita.
Ameongeza kuwa ishu ya uwanja utakaotumika, anaufahamu vizuri kwani ameuchezea hivyo haumpi wasiwasi na kwamba wamejipanga kushinda.
"Siwezi kueleza mipango kwa undani ila tumejipanga kushinda, tunajua tutapata changamoto kwasababu wapinzani kupata matokeo yasiyoridhisha kwenye mechi yao iliyopita, ishu ya uwanja hainipi wasiwasi naujua vizuri," amesema Mkwasa.
Aidha baada ya kuwasili kwa timu hiyo imeelezwa huenda leo Jumatano ikajifua kwenye viwanja vya Chuo cha Ualimu Butimba.
Yanga inaingia kucheza mechi hiyo ikiwa na kumbukumbu nzuri ya kuifunga JKT Tanzania bao 3-2 huku Alliance yenyewe ikiambulia kipigo cha bao 5-0 dhidi ya Azam FC.
0 Comments