Kocha: Simba hii acha kabisa

 Kocha Mkuu wa Simba, Mbelgiji Patrick Aussems amesema, wachezaji wake wamebadilika kwa kiasi kikubwa na morali ipo juu sana.

Aussems amefunguka hayo kutokana na matokeo anayopata katika mechi za Ligi Kuu Bara ambapo sasa ni vinara lakini pia walivyoweka rekodi kwenye michuano ya Ligi ya Mabingwa Afrika.
Amesema, kadri siku zinavyokwenda na wachezaji wanakaa pamoja na kuzoeana kinachotokea sasa ni matunda anayoyapata sasa.
"Kwa sasa Simba ina mabadiliko makubwa kitimu na mchezaji mmoja mmoja. Ni watu wanajielewa, wanatambua wanachofanya na morali ipo juu,"alisema Aussems.
Akizungumzia ushindi waliopata mbele ya Coastal Union, Aussems amesema, mwanzo wa mchezo ilimpa wakati mgumu kwani hadi wanakwenda mapumziko matokeo hayakuwa mazuri ilikuwa 2-1.
"Tulizungumza na tulivyorudi wakafunga mabao sita ilinipa nguvu na ingawa tunatakiwa kupambana zaidi,"alisema Aussems.
Anasema, anashukuru hawajaongeza majeruhi katika mchezo huo tofauti na mingine iliyopita ambapo wachezaji kama mabeki Pascal Wawa na Paul Bukaba pamoja na mshambuliaji John Bocco aliumia.