KOCHA wa Simba, Mbelgiji Patrick Aussems ataondoka nchini alfajiri kesho Jumamosi kuelekea kwao kwa ajili ya mapumziko kabla ya kuanza maandalizi ya msimu ujao wa Ligi Kuu Bara.
Mwenyekiti wa Bodi ya Wakurugenzi ya Simba, Mohammed Dewji 'Mo Dewji' ameweka wazi juu ya maandalizi kabambe ya kikosi chao na kwamba kambi yoa itakuwa Ulaya.
Aussems alisema anakwenda kwao Ubelgiji kuonana na familia yake lakini ripoti ya usajili wa nyota wapya amewakabidhi viongozi na akirudi anataka kuungana na wachezaji hao wapya na wale wa zamani ili kuisuka Simba imara.
"Nina imani na uongozi utafanya kazi nzuri katika usajili huu kama vile ambavyo ripoti inasema kuhakikisha wanapatikana wachezaji wazuri na wenye mahitaji kulingana na makosa ambayo tulikuwa tunayaonesha msimu huu," alisema.
"Sehemu ya maandalizi bora ni mwanzo mzuri wa msimu ndio maana tumelenga kufanya maandalizi yetu mapema na mahala sahihi kama ambavyo ilikuwa msimu uliopita na kufanya vizuri na kufikia malengo mapya ya timu kama ilivyokuwa msimu huu.
"Lakini nisiache kuwapongeza mashabiki wote wa Simba kwani haya mafanikio msimu huu yamechangiwa na wao na tunaomba msimu ujao kuongeza nguvu kwani wakifanya hivyo wachezaji na benchi la ufundi tunazidi kuhamasika," anasema Aussems.
0 Comments