AISHI Manula ndiye anayeshikilia rekodi ya kipa aliyefungwa mabao machache mpaka sasa katika Ligi Kuu Bara, huku akiwa ndiye tegemo wa Simba na Taifa Stars, lakini buana kipa huyo anafichua kwa sasa akili zake zipo Misri tu kuelekea Fainali za Afcon 2019.
Manula alisema anazisubiri kwa hamu kubwa fainali hizo zitakazopigwa nchini humo kuanzia Juni 21-Julai 19, kwani anataka kutumia nafasi kujitangaza zaidi duniani.
“Fainali za AFCON ni ndoto za kila mchezaji anayejitambua. Binafsi kwa uwezo wa Mungu nataka kutumia nafasi hiyo kwa nguvu na malengo makubwa kuhakikisha nafikia malengo yangu,” alisema Manula aliyeidakia mechi zote za Stars wakati wa kuwania kufuzu.
Alisema, fainali za AFCON zimekuwa zikiwatambulisha wachezaji wengi wa Afrika na kupata timu kubwa zenye mafanikio hasa Ulaya na akawataka Watanzania wasiwe na wasiwasi juu ya hilo.
“Kikubwa Watanzania watuamini na watambue hili jukumu si la wachezaji na benchi la ufundi ni letu sote kila mmoja ana mchango wake kuhakikisha Taifa Stars inafikia malengo,” alisema Manula aliyeibuliwa na kupata umaarufu na kikosi cha Azam FC.
Manula anayekwenda kushiriki fainali hizo kwa mara ya kwanza huku Dennis Onyango kipa na nahodha wa Uganda ndiye anashikiria nafasi ya ubora kwa walinda mlango wote Afrika.
0 Comments