SABABU YA IBRAHIM AJIBU KUWEKWA BENCHI MBELE YA ALLIANCE YABAINISHWA

KOCHA Mkuu wa Yanga, Mwinyi Zahera, amesema sababu kubwa iliyomfanya asimtumie nahodha wake kwenye mchezo dhidi ya Alliance ni za kiufundi kutokana na uhitaji wa mchezo wenyewe.

Ibrahim Ajibu mzee wa 'mi-assist' alianza benchi na alitumia dakika zote 90 kuwa kocha mchezaji kwani hakupata nafasi ya kuingia kuonyesha udambwiudambwi wake kwenye mchezo huo ambao Yanga ilishinda kwa bao 1-0 Uwanja wa CCM Kirumba.

"Sikuanza kumtumia Ajibu kwenye mchezo wetu dhidi ya Alliance kutokana na sababu za kiufundi, nilitumia muda mwingi kuwatizama Alliance nikagundua kwamba ni wachezaji wepesi na wana spidi Uwanjani nikaona mchezo huo hautakuwa sawa kwa Ajibu.

"Uwezo wa Ajibu kwenda kwa kasi akiwa ndani ya Uwanja ni mdogo hivyo nikaona ni kheri aanze benchi asubiri kwanza wale wenye kasi waanze na tumefanikiwa kupata pointi tatu, hesabu zetu zimekamilika na tunaanza kupiga hesabu kwa ajili ya michezo yetu inayofuata," amesema Zahera.

Mguu wa kulia wa Ajibu umetoa assist 13 huku assist moja akitoa kwa kichwa na kumfanya awe na jumla ya assist 14 akiwakimbiza wachezaji wote bongo kwa assist.