Kocha: Huyu Msuva mdogo ni wa ajabu!

 Kocha Charles Mkwasa aliyemnoa staa wa Morocco, Simon Msuva na mdogo wake,  James Msuva amefunguka mazito ambayo wadau wengi wa soka walikuwa hawajui juu ya jamaa hao.

Simon na James ni mtu na mdogo wake. Simon anacheza soka la kulipwa Klabu ya Difaâ El Jadidi ya nchini Morocco na James anaichezea KMC ya Dar es Salaam.

Mkwasa amesema, wachezaji hao aliwafundisha soka wakiwa watoto wadogo Uwanja wa Leaders Club jijini Dar es Salaam hivyo anajua vizuri viwango vyao.

Amesema, kiwango cha James katika miaka ile alitegemea na yeye katika miaka ya sasa angekuwa nje ya nchi kama kaka yake kutokana na ubora aliokuwa nao.

"Unajua James ni mchezaji mzuri, kipindi kile alikuwa ana uwezo wa juu kupita kiasi pengine hata kumzidi kaka yake na nilitegemea na yeye angekuwa miongoni mwa watakaokuwa nje lakini ndiyo hivyo sijui imekuwaje kwa sasa,"alisema Mkwasa.

Kocha huyo wa zamani wa Yanga na timu za Taifa Stars pamoja na Twiga Stars amesema, kama mchezaji huyo atatambua vizuri kipaji chake na kuongeza bidii atafika mbali.