BAADA ya mabingwa watetezi wa kombe la Ligi Kuu Bara kupoteza mchezo wao wa kwanza kwa kufungwa mabao 5-0 uongozi wa Simba umetaja kilichowaponza wakafungwa pamoja na hesabu zao kwa sasa baada ya kurejea bongo.

Kocha Mkuu wa Simba, Patrick Aussems amesema kilichowafanya wakapoteza mchezo wao ni wachezaji kushindwa kuwa na morali nzuri ya kupambana Uwanjani pamoja na makosa ya kawaida ya kiufundi waliyoyafanya.

"Tumepoteza mchezo wetu kutokana na makosa ya kiufundi ambayo tumeyafanya pia wachezaji walikosa kuwa na morali kupambana pia michuano hii ya kimataifa ina ushindani mkubwa, bado tuna nafasi ya kufanya vizuri," alisema.

Ofisa Habari wa Simba, Haji Manara amesema ni maumivu makubwa kwa timu na Taifa ila sio muda wa kutafuta mchawi nani zaidi ya kuungana kwa ajili ya michezo yao inayofuata kimataifa.

"Tumerejea salama ni jambo la kushukuru kwa yote yaliyotokea, kwa sasa timu inaanza kujipanga kwa ajili ya mchezo wetu wa jumatano dhidi ya AFC Leopards ya Kenya ukiwa ni mchezo wetu wa mashindano ya SportPesa Cup," alisema Manara.