Kocha wa Kenya afungiwa mechi mbili CECAFA

Baraza la vyama vya soka kwa nchi za Afrika Mashariki (CECAFA) limemfungia kwa michezo miwili kocha mkuu wa Kenya, Francis Kimanzi.

Kwa mujibu wa taarifa ya CECAFA iliyotolewa tarehe 8 Disemba 2019 kocha huyo amekutwa na makosa ya vitendo visivyo vya kimichezo na ataanza kutumikia adhabu yake kuanzia mchezo wa pili wa timu yake iliyopo kwenye kundi B.

Sambamba na Kimanzi, CECAFA pia imetoa onyo kwa viongozi wengine wa benchi la ufundi la Kenya kwa vitendo visivyo vya kiungwana mchezoni.

Kimanzi aliiongoza vyema Harambee Stars kwenye mchezo wa kwanza wa kutetea ubingwa wao walipofanikiwa kuifunga Kilimanjaro Stars kwa bao 1-0.