Maneno ya Mo Ibrahim, apania kufanya makubwa Namungo

Dar es Salaam. Kiungo Mohamed Ibrahim 'Mo Ibrahim' amesema anataka kuonyesha ubora wake katika kikosi cha Namungo ili kufungua milango yake ya mafanikio msimu ujao.

Mo Ibrahim amesema apigania kucheza kikosi cha kwanza anachoamini kitamfanya nyota yake ing'are baada ya wadau wa soka kumuona kwa nadra uwanjani.

Mo Ibrahim amejiunga na Namungo akitokea Simba ambako hakuwa na nafasi kwenye kikosi cha kwanza cha kocha Patrick Aussems, amesema msimu huu kwake anauona utakuwa wa manufaa makubwa.

"Sijajichukulia kwamba nimetoka Simba kwa hiyo nitakuwa napata nafasi ya kucheza kirahisi bila kujituma, nimejipanga kuhakikisha najihakikishia nafasi kwenye kikosi cha kwanza.

"Naamini kupitia Namungo uwezo na heshima yangu uwanjani vitarejea, changamoto kwenye soka ndio zile zile kikubwa ni kujitambua,"alisema Mo Ibrahimu.