BONDIA Jafet Kaseba amesikia tambo za wanamasumbwi wengi akiwemo Dullah Mbabe na Francis Cheka kuwa wao ni wababe, na wengine wakitaka kujua anastaafu lini, lakini amesisitiza hawezi kustaafu kwa sasa.

 Kaseba amesema kwa uwezo alionao atapanda ulingoni bila mazoezi na ataonyesha maajabu ya kufa mtu, hana wasiwasi na kipaji chake.

"Mimi hii kazi ni sawa na ugali na mboga, kiukweli bado sijajua ni lini hasa nitaacha michezo kwa sababu kama sifa na jina nimeshajenga sana, namshukuru Mungu ila napanda ulingoni kama mapenzi yangu tu.

"Hakuna ambaye ananitisha kwa sasa, ninaamini ninaweza kushinda kwenye pambano lolote nitakalocheza kuanzia sasa muda wowote bila hata kufanya mazoezi kwa kuwa najiamini," alisema.